IN DIE NUUS

Nico Botha

'n Paar gedagtes oor nuusgebeure in die lig van die Skrif

"BESKERM ONS KINDERS"

'n Tweejarige dogtertjie het verlede Saterdag in Pretoria 'n plakkaat vasgehou met die woorde daarop : "Beskerm ons kinders".
Dit was deel van Finesse en die ATKV Dames se protesoptog teen die verkragting van kinders. Vir baie van ons is protesoptogte en plakkaatswaaiende betogers nog "kultuurvreemde" verskynsels, maar die erns van die misdaadsituasie dwing mense om hard en duidelik optrede te eis. Die klein Abygail wat die plakkaat vashou waarop vir haar en haar maatjies se veiligheid gepleit word, word groot met hierdie vorm van openbare protes.
In sy antwoord het minister Buthelezi gesê dat kinderverkragting en molestering die top van 'n ysberg in "'n oseaan van armoede en slegte maatskaplike omstandighede is" (Beeld 28 Oktober).
Die minister weet dat dit is hoe droewig die prentjie is .
Die foto van een mooi skugter dogtertjie beeld 'n verskriklike toneel van honger en verwaarlosing en armoede en ordelose sedeloosheid uit.

Daarom is dit goed dat 'n versoekskrif met 15 000 handtekeninge oorhandig kon word sodat die "top van die ysberg" aandag kan kry.

Dit onderstreep 'n paar waarhede :

• Die oseaan van ellende mag nie ons aandag aftrek van die teer saak van klein dogtertjies wat deur geweldenaars vermink word nie.
• Soos met baie ander eeuwels sal ons nie kindermolestering kan verdra totdat daar eendag 'n verbetering kom in die huidige gemeenskapsellende nie.
• Ons leef tot voor die wederkoms van Christus in 'n wêreld waarin ons altyd met die mens in sy sondige ontaarding te doen sal hê, maar juis daarom moet ons ons verset teen elke vorm van kwaad (vgl. 1 Petr. 2:1).
• Ons ouers moet sorg dat hulle tyd het om geduldig na hulle kinders te luister, en om met groot wysheid hulle kinders te lei sodat hulle tussen al die wreedheid tog veilig kan wees , na siel en liggaam. Wat sal dit help dat 'n dogtertjie ongeskonde grootword en in haar tienerjare self haar liggaam (en siel !) weggooi omdat sy nooit Jesus as Here leer ken het nie ? !

Maar die ander deel van die prentjie is ook waar :
Terwyl ons pleit "Beskerm ons kinders", moet ons hand in die sak steek en arms uit die moue uitkry, en werklik iets aan die armoede en maatskaplike ellende van miljoene in ons land begin doen. As ons maak asof die ysberg nie bestaan nie, gaan dit ons verpletter, met ons pragtige kinders saam met ons !