GesprekskamerGesprekskamer
My huwelik is onder druk - wat maak ek nou?
Vraag : Ek en my man is geesvervulde wedergebore kinders van God, maar ons huwelik is geweldig onder aanslag. My man dreig om van my te skei, omdat die druk van 'n eie besigheid, motors wat bly breek, konflik tussen hom en sy seun net te veel raak. Ek probeer die heeltyd om die vrede te bewaar maar slaag nie daarin nie. Ek voel op die oomblik God verlate.
Antwoord:
Een van die Satan se groot wapens wat hy teen huwelike gebruik is die gebrek aan tyd. Jesus sê in Matteus 13 dat die sorge van die lewe kan keer dat die Woord in ons lewe wortel skiet en vrugte dra. Al het ons die Woord met blydskap aangeneem, dit word deur die sorge van die lewe verdring. Julle het saamwees-tyd nodig om die Woord van God in julle huwelik te laat vrug dra. Wanneer die rooi ligte aangaan soos jy in jou vraag beskryf, is dit tyd om stil te gaan staan. Stop die resies en word stil. Vra die Heilige Gees om julle te lei. Julle moet ingrypende maatreëls in plek sit om by mekaar uit te kom en rustig by mekaar en by julle gesin te kan wees. Dit lyk miskien nou onmoontlik, maar ’n mens moet dinge opweeg. As julle dit nie doen nie, wat gaan julle verloor? Jy antwoord hierdie vraag in jou vraag. God het ons geskape in hierdie siklus van inspanning en ontspanning. Werk en rus, ons moet onsself tyd gee om soos God by die skepping na ons werk te kyk en te kan sê “dit is goed”. Ek het hierdie “a-ha” momente in my lewe nodig. Indien ek hierdie ingeskape patroon verbreek, raak ek oneffektief. Soos ’n langafstand atleet wat aan die begin te vinnig hardloop en aan die einde van die wedloop net nie meer stamina oor het nie. So is dit as ons nie ook rus en ontspan nie - jy moet net al meer tyd insit en kry net al minder in ’n uur gedoen. Daarom het jy skynbaar nog minder tyd om te rus, saam te wees, kerk toe te gaan. Daarom raak jy net nog minder produktief.
Julle moet God vertrou met jou man se besigheid, dat Hy dit suskesvol sal maak al bestee jou man minder tyd daaraan. Julle moet tyd maak om Hom in julle saamwees as man en vrou en as gesin te dien. Julle moet die Woord wat sê dat julle ook moet rus laat wortelskiet in julle lewe. Die konflik tussen jou man en sy seun is waarskynlik ook vanweë te min kwaliteit/omgee tyd saam met mekaar. Dit alles is rooi ligte waardeur die Gees julle roep om te stop en te besin. Satan wil dat julle net sal voort hardloop want hy wil julle beroof van al die mooi dinge wat God julle as sy kinders wil gee.
Jy is nie van God verlate nie. Dit is sy Gees wat jou laat hulp soek het met hierdie vraag. Hy roep julle na groen weivelde na waters waar daar rus is. Jy moet ook jou tussenganger werk in sy krag doen. Besef dat jy nie die vrede tussen jou man en sy seun kan bewaar nie, God moet dit doen. Jy kan net jou bes doen, maar moenie verantwoordelikheid aanvaar vir die eindresultaat nie. God alleen kan dit doen. Jou sukses is dus wanneer jy gedoen het wat jy kan en nie wanneer daar vrede is nie. Doen dus jou bes, ontspan, en wag op God. Die aanslag van satan teen jou op die oomblik is om jou soos ‘n “verloorder” te laat voel. In Ef. 6 staan dat ons die helm van verlossing moet aantrek in ons stryd. Jesus het die oorwinning behaal en ons wat in Hom glo is wenners of ons kan ook sê oorwinnaars. Ons moet hierdie oorwinning voortdurend waar maak in ons lewe, ons moet elke keer as die duiwel sê: “jy gaan misluk”, vasgryp daaraan dat daar niks is wat ons kan onderkry nie. So sit ons die helm van verlossing op en kan die satan ons nie oorwin nie.
Jy het die Gees van God in jou, Hy sal jou wysheid gee (Jakobus 1). Bid, dink, soek raad! Hy sal jou lei.
Julle het waarskynlik ook berading nodig. Iemand wat van buite af vir julle kan begelei in die Woord. Julle is welkom om met een van ons predikante te skakel. Daar is ook ’n huwelikskursus beskikbaar by ons kerk – skryf aan
Hierdie e-pos adres is teen spambotte beskerm, jy moet JavaSkrip op jou webblaaier ontsper om dit te kan sien
om te bestel.
Gert Breed
Oortree ons die vierde gebod om Sondag en nie Saterdag nie die Sabbat te hou?
Vraag : Is dit nie 'n oortreding van die vierde gebod om Sabat te hou op Sondae inpleks van Saterdae nie? Volgens die Adventiste geloof is Saterdag-Sabat die "teken" van God aan Christene en Sondag-Sabat die "teken" van die satan wat ons mislei rondom die vierde gebod.
Antwoord:
Daar is natuurlik ‘n baie lang antwoord moontlik op hierdie vraag, want oor “Sabbat/Sondag” is al boekdele geskryf.
Ek gaan egter probeer om ‘n korterige antwoord te gee :
Van Genesis 2 : 3 af lees ons in baie boeke van die Bybel van die Sabbat van die Here , ‘n rusdag, ‘n sabbat wat aan Hom gewy is en wat op die sewende dag van die week “gedenk” en “geheilig” moes word na die sesdag werksweek. Dit was een van die kenmerke van God se volk wat hulle van die ander nasies onderskei het. Rondom die vierde gebod het in die geskrifte van die rabbi’s lang lyste reëls en bepalinge gekom in aansluiting by die Bybelse voorskrifte rondom die Sabbat of Rusdag. In die tyd van Jesus het hulle swaar laste op die Jode gelê het oor wat alles op daardie dag nie gedoen mog word nie.
Dis opmerklik dat een van die redes waarom die Skrifgeleerdes en Fariseërs Jesus gedurig beskuldig het van ongehoorsaamheid aan die Wet, juis was omdat Hyself nie hulle streng sabbatsreëls nagekom het nie ( lees gerus weer Matt. 12 : 1 vlg.; 12:10). Hy het ook duidelik gesê dat die sabbatdag vir die mens gemaak is en nie die mens vir die sabbat nie, en dat Hy “Here is ook oor die sabbat”( Mark.2:27, 28).
Na die opstanding van Jesus op die eerste dag van die week (die Sondag) lees ons gereeld dat die apostels en ander christene ook op die eerste dag van die week saam gekom het (Joh. 20:19,26) en dat die dag van sy opstanding ‘n al hoe groter plek in hulle lewe gekry het.
Die belangrikste is egter dat die sabbat in die Nuwe Testament genoem word as een van die “voorskrifte” wat “maar net die skaduwee is van wat sou kom; die werklikheid is Christus” (Kol.2 : 16,17) . Net soos die offers en die reiningingsvoorskrifte was die sabbat met sy streng bepalings deel van alles waardeur God sy volk gelei en voorberei het om uit te sien na die koms van die Verlosser wat ware rus vir sy volk sal bewerk , die ware ewige sabbat van vrede by God sal laat aanbreek.
Ons kan die gedagte dat dit alles maar net skaduwee was dan so verstaan : Dis soos wanneer die son agter ‘n hoë gebou is en jy al in die skaduwee na die gebou toe kan loop. Die skaduwee laat jou besef dat daar ‘n gebou is en jy kan uit die skaduwee ook aflei of die gebou breed is of ‘n spits punt het, maar dis net die skaduwee! As jy al met die skaduwee voortbeweeg kom jou by die gebou self en sien jy eers hoe pragtig dit is. Jesus is die vervulling van die wet en profesië!
Daarmee word dit ook sommer duidelik waarom die Sewendedag Adventiste nie saam met ons die Sondag kan vier as die dag van Jesus se opstanding en die begin van ware lewe nie : Hulle aanvaar nie dat Jesus Christus gekom het as die vervulling van al God se beloftes in die Ou Testament nie en dat Hy die werklikheid is waarna al die offers en ook die sabbat Sy volk wou laat uitsien nie. Hulle leer dat die wederkoms sal plaasvind wanneer die voorskrif van die wet gehoorsaam word, en gaan by die heerlike waarheid verby dat Jesus regtig alles aan die kruis “volbring” het. Die volledige en heerlike koms van sy koninkryk by Sy wederkoms, gebeur nie omdat mense aan die wet gehoorsaam is nie, maar omdat ons in ware geloof verbind is aan Jesus Christus wat ‘n nuwe en ware lewe vir ons laat aanbreek het.
“Sondag-sabbat” is nie die teken van die satan wat ons mislei nie! Ons Rusdag op die eerste dag van die week is juis die teken dat ons glo in ons Here wat alles gedoen het sodat ons elke week in gehoorsaamheid en oorgawe aan Hom kan begin.
Nico Botha
Verdere Artikels...
Bladsy 1 van 36